Hanuman Chalisa

श्रीगुरु चरन सरोज रज, निज मनु मुकुरु सुधारि। बरनउँ रघुबर बिमल जसु, जो दायकु फल चारि॥

Shri Guru charan saroj raj, nij man mukur sudhari. Baranau Raghubar bimal jasu, jo dayaku phal chari.

बुद्धिहीन तनु जानिके, सुमिरौं पवन-कुमार। बल बुद्धि बिद्या देहु मोहिं, हरहु कलेस बिकार॥

Buddhiheen tanu jaanike, sumirau Pavan-Kumar. Bal buddhi bidya dehu mohi, harahu kales bikaar.

जय हनुमान ज्ञान गुन सागर। जय कपीस तिहुँ लोक उजागर॥

Jai Hanuman gyan gun sagar. Jai Kapees tihu lok ujagar.

राम दूत अतुलित बल धामा। अंजनि-पुत्र पवनसुत नामा॥

Ram doot atulit bal dhama. Anjani-putra Pavansut nama.

महाबीर बिक्रम बजरंगी। कुमति निवार सुमति के संगी॥

Mahabeer bikram Bajrangi. Kumati nivaar sumati ke sangi.

कंचन बरन बिराज सुबेसा। कानन कुण्डल कुँचित केसा॥

Kanchan baran biraj subesa. Kanan kundal kunchit kesa.

हाथ बज्र अरु ध्वजा बिराजै। काँधे मूँज जनेउ साजै॥

Haath bajra aru dhwaja birajai. Kaandhe moonj janeu saajai.

शंकर सुवन केसरीनंदन। तेज प्रताप महा जग बंदन॥

Shankar suvan Kesari-nandan. Tej pratap maha jag bandan.

बिद्यावान गुनी अति चातुर। राम काज करिबे को आतुर॥

Bidyavaan guni ati chatur. Ram kaaj karibe ko aatur.

प्रभु चरित्र सुनिबे को रसिया। राम लखन सीता मन बसिया॥

Prabhu charitra sunibe ko rasiya. Ram Lakhan Sita man basiya.

सूक्ष्म रूप धरि सियहिं दिखावा। बिकट रूप धरि लंक जरावा॥

Sookshma roop dhari Siyahi dikhava. Bikat roop dhari Lank jarava.

भीम रूप धरि असुर सँहारे। रामचन्द्र के काज सँवारे॥

Bheem roop dhari asur sanhare. Ramchandra ke kaaj sanvare.

लाय सजीवन लखन जियाए। श्रीरघुबीर हरषि उर लाये॥

Laay sajeevan Lakhan jiyaye. Shri Raghubeer harashi ur laye.

रघुपति कीन्ही बहुत बड़ाई। तुम मम प्रिय भरतहि सम भाई॥

Raghupati keenhi bahut badai. Tum mam priya Bharat-hi sam bhai.

सहस बदन तुम्हरो जस गावैं। अस कहि श्रीपति कण्ठ लगावैं॥

Sahas badan tumharo jas gaavain. As kahi Shripati kanth lagaavain.

सनकादिक ब्रह्मादि मुनीसा। नारद सारद सहित अहीसा॥

Sanakadik Brahmadi muneesa. Narad Sarad sahit Aheesa.

जम कुबेर दिगपाल जहाँ ते। कबि कोबिद कहि सके कहाँ ते॥

Jam Kuber digpaal jahan te. Kabi kobid kahi sake kahan te.

तुम उपकार सुग्रीवहिं कीन्हा। राम मिलाय राज पद दीन्हा॥

Tum upkaar Sugreevahi keenha. Ram milaay raj pad deenha.

तुम्हरो मंत्र बिभीषण माना। लंकेश्वर भए सब जग जाना॥

Tumharo mantra Bibheeshan maana. Lankeshwar bhaye sab jag jaana.

जुग सहस्र जोजन पर भानु। लील्यो ताहि मधुर फल जानू॥

Jug sahastra jojan par bhanu. Leelyo taahi madhur phal jaanu.

प्रभु मुद्रिका मेलि मुख माहीं। जलधि लाँघि गये अचरज नाहीं॥

Prabhu mudrika meli mukh maahi. Jaladhi laanghi gaye acharaj naahi.

दुर्गम काज जगत के जेते। सुगम अनुग्रह तुम्हरे तेते॥

Durgam kaaj jagat ke jete. Sugam anugrah tumhare tete.

राम दुआरे तुम रखवारे। होत न आज्ञा बिनु पैसारे॥

Ram duaare tum rakhvaare. Hot na aagya binu paisaare.

सब सुख लहै तुम्हारी सरना। तुम रक्षक काहू को डर ना॥

Sab sukh lahai tumhari sarna. Tum rakshak kaahu ko dar na.

आपन तेज सम्हारो आपै। तीनों लोक हाँक तै काँपै॥

Aapan tej samhaaro aapai. Teenon lok haank tai kaanpai.

भूत पिशाच निकट नहिं आवै। महावीर जब नाम सुनावै॥

Bhoot pishaach nikat nahi aavai. Mahaveer jab naam sunaavai.

नासै रोग हरै सब पीरा। जपत निरंतर हनुमत बीरा॥

Naasai rog harai sab peera. Japat nirantar Hanumat beera.

संकट तै हनुमान छुड़ावै। मन क्रम बचन ध्यान जो लावै॥

Sankat tai Hanuman chhudaavai. Man kram bachan dhyan jo laavai.

सब पर राम तपस्वी राजा। तिन के काज सकल तुम साजा॥

Sab par Ram tapasvi raja. Tin ke kaaj sakal tum saaja.

और मनोरथ जो कोई लावै। सोई अमित जीवन फल पावै॥

Aur manorath jo koi laavai. Soi amit jeevan phal paavai.

चारों जुग परताप तुम्हारा। है परसिद्ध जगत उजियारा॥

Chaaron jug partaap tumhara. Hai parsiddh jagat ujiyara.

साधु सन्त के तुम रखवारे। असुर निकंदन राम दुलारे॥

Sadhu sant ke tum rakhvaare. Asur nikandan Ram dulaare.

अष्ट सिद्धि नौ निधि के दाता। अस बर दीन जानकी माता॥

Asht siddhi nau nidhi ke daata. As bar deen Janki Mata.

राम रसायन तुम्हरे पासा। सदा रहो रघुपति के दासा॥

Ram rasayan tumhare paasa. Sada raho Raghupati ke daasa.

तुम्हरे भजन राम को पावै। जनम-जनम के दुख बिसरावै॥

Tumhare bhajan Ram ko paavai. Janam-janam ke dukh bisraavai.

अंत काल रघुवरपुर जाई। जहाँ जन्म हरि-भक्त कहाई॥

Ant kaal Raghuvarpur jaai. Jahan janma Hari-bhakt kahaai.

और देवता चित्त ना धरई। हनुमत सेइ सर्ब सुख करई॥

Aur devta chitt naa dharai. Hanumat sei sarb sukh karai.

संकट कटै मिटै सब पीरा। जो सुमिरै हनुमत बलबीरा॥

Sankat katai mitai sab peera. Jo sumirai Hanumat Balbeera.

जै जै जै हनुमान गोसाईं। कृपा करहु गुरुदेव की नाईं॥

Jai jai jai Hanuman Gosai. Kripa karahu Gurudev ki naai.

जो सत बार पाठ कर कोई। छूटहि बंदि महा सुख होई॥

Jo sat baar paath kar koi. Chhootahi bandi maha sukh hoi.

जो यह पढ़ै हनुमान चालीसा। होय सिद्धि साखी गौरीसा॥

Jo yah padhai Hanuman Chalisa. Hoy siddhi saakhi Gaureesa.

तुलसीदास सदा हरि चेरा। कीजै नाथ हृदय महँ डेरा॥

Tulsidas sada Hari chera. Keejai Nath hriday mah dera.

पवनतनय संकट हरन, मंगल मूरति रूप। राम लखन सीता सहित, हृदय बसहु सुर भूप॥

Pavantanay sankat haran, mangal moorati roop. Ram Lakhan Sita sahit, hriday basahu sur bhoop.